Ekainak 28 – LGTBIQ+ Harrotasunaren Nazioarteko Eguna
ELKARTEANetik Desgaitasun Fisikoa duten Pertsonen Euskadiko Elkarte Koordinatzaileak adierazpen bat argitaratu nahi du LGTBIQ+ Harrotasunaren Nazioarteko Eguna dela eta.
Ekainaren 28a data garrantzitsua da sexu-orientazio eta -identitate guztiak, genero-adierazpen guztiak eta sexu-ezaugarri desberdinak ikusarazteko eta ospatzeko. Baina borroka eguna ere bada, eta izaten jarraitu behar du. Desgaitasuna duten LGTBIQ+ pertsonen ahotsa altxatzeko eta eskubideekiko errespetua eta bermea eskatzeko jardunaldia da. Pertsona horiek ere badira, maite dute, nahi dute, identifikatzen dira, amets egiten dute eta eutsi egiten diote, maizegi, bi aldiz ikusezin bihurtzen dituen gizarte batean.
Kolektibo honen bereizgarri den aniztasunetik, izan nahi dutena izateko, askatasunez maitatzeko, ahots propioa izateko eta espazio publikoa harrotasunez eta duintasunez okupatzeko eskubidea berresten da.
Existentzia eta eskubideak aitortzea
Sexualitatea gizakiaren funtsezko dimentsioa da. Desgaitasuna duten pertsonak ez dira salbuespena. Kolektibo horretan ere askotariko orientazio eta identitate sexualak, genero-adierazpenak eta ezaugarri sexualak daude, gainerako gizartean bezala. Desgaitasuna duten Pertsonen Eskubideei buruzko Konbentzioak (DPEK) berdintasunerako eta diskriminaziorik ez izateko eskubidea aitortzen du ( 5.art); eskubide horiek, gaur egun, oraindik ez dira erabat bermatzen desgaitasuna duten pertsona guztientzat.
Ikusezintasunaren eta diskriminazio bikoitzaren salaketa
Desgaitasuna duten LGTBIQ+ pertsonek oraindik ere estigmei aurre egiten diete, eta estigma horiek infantilizatu, desexualizatu eta baztertu egiten dituzte. Errealitate hori ezintasunaren mugimenduaren barruan nahiz LGTBIQ+ mugimenduan gertatzen da. Diskriminazio intersekzionalak diskurtso publikoaren, politika instituzionalen eta parte-hartze sozialerako espazioen ertzetara baztertzen ditu.
Oztoporik gabeko Harrotasunaren alde
LGTBIQ+ mugimenduaren hasieratik, desgaitasuna duten pertsona batzuk eskubideen aldeko borrokaren lehen lerroan egon dira. Gaur egun, Harrotasunari lotutako ekitaldi guztiek ikusgarritasuna, parte-hartze baldintza bidezkoak eta irisgarritasun unibertsala bermatzea eskatzen da. Desgaitasuna izateak eta LGTBIQ+ izateak ez du duintasunik eta eskubiderik kentzen. Aitzitik, pertsona horiek beren aniztasuna aldarrikatzeko eta errekonozimendua eskatzeko toki batean kokatzen ditu. Horregatik, oztoporik gabeko, bazterketarik gabeko eta benetan inklusiboa den Harrotasuna defendatzen da.
Aldarrikapenak
- LGTBIQ+ desgaitasuna duten pertsonek politika publikoetan aurrez aurre duten diskriminazio bikoitza esplizituki onartzea, ikuspegi intersekzional erreala txertatuz.
- Afektibitatea eta sexualitatea askatasunez bizitzeko eskubidea, estereotiporik eta tutoretzarik gabe.
- Sexu-hezkuntza zientifikoa, integrala eta inklusiboa haurtzarotik eta gaztarotik, desgaitasuna duten pertsonak desio- eta eskubide-subjektu gisa aitortuko dituena.
- Material eskuragarriak, presentzia kanpaina instituzionaletan eta irisgarritasun osoa Harrotasunaren ekitaldietan. Irisgarritasunik gabe ez dagoelako berdintasunik.
- Osasun-, hezkuntza- eta gizarte-arloko profesionalentzako berariazko prestakuntza, errespetuzko eta aurreiritzirik gabeko laguntza bermatuko duena.
- Sexualitateari eta aniztasunari buruzko ikerketa eta ezagutza sustatzea kolektiboan, arreta berezia jarriz desgaitasuna duten LBTQ+ emakumeetan, diskriminazio-modu anitzen eraginpean baitaude.
- Gizarte-mugimenduen arteko aliantzak bultzatzea, aniztasuna ospatuko duen eta bazterkeria mota oro konponduko duen gizarte baterantz kolektiboki aurrera egiteko.
Guzti honengatik ELKARTEANetik dei irmoa egiten die erakundeei, gizarte-mugimenduei, erakundeei eta gizarte osoari benetan inklusiboa den Harrotasuna eraikitzeko konpromiso aktiboa har dezaten. Inor atzean utziko ez duen Harrotasuna, oztopo fisiko, sozial eta sinbolikoak ezabatuko dituena, eta aniztasuna aberastasun kolektibo gisa onartuko duena. Ez dagoelako justizia sozialik eskuragarritasunik gabe, ezta askatasunik ere benetako berdintasunik gabe.
Ekainak 28